Psa 95 | KGF | STEP | Hagic nini Yawe legic héimima, neŋaŋ aŋgéŋ titiac ʒamanʒiŋ ségiségi wamma legic héimiwiŋ.

Psalms 95

Mepésimima niŋtoho wammiwiŋʒé nunuruzac.

1 Hagic nini Yawe legic héimima, neŋaŋ aŋgéŋ titiac ʒamanʒiŋ ségiségi wamma legic héimiwiŋ. 2 Ewa hia ac ézéma wésiaiguc kemma legic ʒéra ʒéni iwac muru kemmac.

3 Yawe imi Anutu kuneŋ yanda, anutu mocʒoŋ ionac qacginaiguc eŋeŋa kecʒac. 4 Baec hiŋgac hiŋgara imi mériaiguc hezac. Baec boŋa eŋeŋa acguc iwac buŋa wanʒac. 5 Konduŋ imi iwac, inéŋ ʒéyu hicŋiyec. Waŋu baec acguc mérianéŋ meyec.

6 Hagic nini sicgéma mepésimima, kekecnina mihicŋi nénécmiyec Yawe iwac muru simiŋ héimiwiŋ. 7 I imi Anutunina, nini imi ic embachéra, rama tuŋa mériaiguc ono onopora.

Ini nalé yomuaru ewaya nimbiŋ ʒé wanʒuiguc imi; 8 Meriba ʒéma baec kérakérasia Masa imuac nalé ésécnec ewa qerigina seliseli ménda wammu. 9 Nalé imuaru yandahécgina ni batucgé némma awinémma wawaŋ memena imi héŋgic. 10 Ni yawuŋ 40 séc hicŋisai imuac niŋyéwécnaguc wamma ʒéyi; Ieneŋ imi ic embac ewagina soho sohoya, nuac héna imi ménda ninʒu. 11 Imuac ni qeri biric wamma ʒéselima ʒéyi. Ieneŋ nuac tac hiahiaruiguc harémuac séc qahac.